Meiser lepchie

Meiser Lepchie

– Alan LH Varte (Ngairang Jr.)

Beiruol porokram (program) pathienni inkhawm an mi thaw pui danin ka lung a kuoi naw ema lo rieksan  dingin thawtanni zingin kan phur suoka. Khawhnawmah ka zawlpa mala Thang kan tuokpuia, Mala iengdinga loriek  i tum am a na, beiruol porokram  ei hmang zo hma chun lo riek da ta lamie a ta. Chawmkhat ka to vawng vawng hnung chun  “ Mala, beiruol porokram ei hmangdan hi ka lung a lut nawh ie, a hawnpuiin an inchawm kawthlenga, anlang a nih anlang, hmutu hai ta ding chauvin anlang an tia chu iengte an lang ka hmu nawh, zan khata I chempai kawlrawk hlip lova biekina I hung pai lut kha tukum beiruol sunga dinga an lang ka hmu sun chu a nih. Inkhawm tan hma innghakbumna dinga hla ei sak hlak am a nih ka ti chu, lam insiek an thawa zan ril chen chen nghakdingin an uma, a tawpah anlam inruia sawt tak tak nghak an ngai, inkhawm ei tan chen hin chu zan dar sawm a ni ta hlak. A lam hai rawi ka en hlakin ka sim a kir. An nuom an ninga khel hril, ka loa manta inru zing zing, mi thil suksuol na an hmu met leh van tawnga inhrosa hlak ,an ni thil suksuol hai hlak mi dang  vawinaw vawi intum an thawa, mi chanchin thanaw hril dara rel hrat hrat hai kha a lam hrat hratin an thanga, hieng hi chu pathien thu awi dan khawm ni naw nih. Lalpa meiser hmathuoitu, ramthim elvar tu ding an la ti tah deu deu, kei chu Meiser Lepchie an nih an bul hnaia khawm ka um nuom tah nawh” ka ta. A mi thlem lungawi zo nawh, ka lo riek inthawk chu thul lovin ka fe peia. Lo lam a tul hlea hnuoi an nal bawk leiin ka sandal bun chu ka hlipa, kar khat thlakna ding ka phur leiin ka phur  a rik bawk si ka sandal chawi chun a mi suk buoi nasa, lam sira maksan ding hlak chun anhmang ngei ngei el ding a ni si, inhma laia lampui sir intuoa pheikhawk sandal in thlar det duota ei maksan hlak lai hai dam, buin kawt hmawltea ei kal hlak hai khan ka ngaituoana nasa takin a thlakbuok hlak. Pathien awi hma khan hieng ang thil tenau hai hi buoipui an tling nawh, kutkem nei chu an um hlaka amiruokchu buoipui tham rukru hrietding an um ngai nawh, hrisitien (Christian) an ta an lumpuoka, bu tak khukin an khukpui tawla, thatna le hmasawnna ding rawm kan ti hi kan thawhla lem a ni hi. Rukru pungna, zu ngawlvei pungna,khel hril indemna suk pung tu a ni lem hi tiin ka lungril a na hle. Kum sawmnga vel liem taha putar pakhat lungawilova chier-in-thluok  vel  a min hriet suok tir. Lo ka tlung chun ka zaupa Thangtinkhumin thingpui hung dawn rawh hohlim na ding khawm ka hriet a ta a mi koa, kan thu hril nuom chu a lo in ang hle el.  Zan sawt chen kan ti tia, kum  sawmhni vel liem taha ei nunphung le nitin fak zawng dan hai kha tienlai thila ngaiin ei vui liem el ding chu an tah hi, thangthar ruoltharin nundan le fakzawng dan chi dang an hung ching thar pei bawka tiin nunhlui rama chun kan lo leng der chu a nih. Pathien tak tak karinge, ringtu nun ka neie nun dan ka lo thiem tah an ti nekin tienlaia ei pi le pu hai a’nthawka ei rochung tlawmngaina, taimakna le indikna hai ngaisang a um lem dai a nih ti malam chun ka tu tieng ka pana, ka lungrila um iemani zat ka hril suok thei lei chun ka rep a thla huoiin ka hriet. Bu ka suonga ka fak khawp zan sawttak hnung chun khuongri inphu dup dupel chu thli’n a hung fen changin ka hang hriet rawpa. “Putar pakhat chier-in-thluok a min hriet suok tir. Un, hiengpu khan zan khawvar varin inchawm kawthleng vel inla, sin le tuon hlak zawng naw ti niu nisa inding hnungin lo vai inthawk inta nisa an hem depin fe phat ti nawk inta, in tirko a dan hre insa hai pahni khan an simbudawi cheu an ta kha. Inkhawm zatin thawlawm ting anta, in thawlawm hai pukha anfaka sin le tuon zawng loa khawsa an nau le te hai khawm kha in chawm thau zo an ta kha. Suokin a pu a ngai ti po in thawa in invet zo an ta kha, a hak puor zat” a ti kha.  Sun zawm ding…

Pastor Thar

Nikum 2009 sung po Weslyne  Methodist Churh (WMC) hnuoia Pro Pastor sin lo thaw tah, a sin thaw that leia hotu hai le kahran mipui ditsak hlaw em em el Pro Pastor  Zahninglo Hmar chu Pathien rama nasa nawkzuola rawngbawl dingin Tarik 07 March 2010 khan 23rd Regional Conference WMC Rengkaiah Pastor puitlinga hlangkai a lo ni tah. Pastor Zahninglo Hmar hi B Th, TCS Sielmat  (2000-2004) le M Div, Eastern Bible College Dimapur (ATA affiliated 2004-2007)  hai ah Bible lo inchuk tah a nih. Pro Pastor a ni sungin Imphal stationah rawng a bawla Pastora namnghet a ni hnungin a biel hmasatakna dingin Cachar & NC Hills a biel a nih. Pastor Zahninglo Hmar hin Gen. Secy Regional Weslyne Methodist Youth Fellowship le Regional Music Promotor WMC sin a chel sa bawk a nih. Kohran le Pathien dit sakna zarah mawphurna rik takel a chunga innghatin a uma, hriselna taimakna le Pathien thlarau pawlzingna a mamaw tak zet  a nih, zotuithieng  tiemtuhai kuomah tawngtainaa lo thangpui hlak dingin ngaina takin ka ngen cheu. Thlalak khawm sawtnawteah hung upload ning a tih.

            Hi thu hi ei hung update in hnu deu tah a nih, a san chu thu chienglem le ringthlak nghakna lei a nih. Tiem tu hai hriet thiem na ka ngen.

Pastor Zahninglo Hmar ordination

Kher nawhs…

KHER NAWH :-* Mi thau nazawng an hausa kher nawh.

* Engineer nazawngin an fakruk kher nawh.

* Hausa nazawng ei ngaisang kher nawh.

* Pathien betu nazawngin an biek fuk kher nawh.

* Thikthu sie nazawng ring an um kher nawh.

* Inti changkang nazawng hi ei hmu changkang kher nawh.

* Kapkar thra nazawngah nau thra an pieng kher nawh.

*Mihlim lam nazawng an lunginruol kher nawh.

* Kekawrte sen nazawng ei hmu kher nawh.

* Ar khuong nazawngin an mi kei tho kher nawh.

* Mautam laia mazu nazawng an lien kher nawh.

* Minister bie thei nazawngin an hlawkpui kher nawh.

* Computer thiem nazawngin thawkna an hmu kher nawh.

* Kamis trawm nazawng hi nawt nam lo tina a ni kher nawh.

* Advertisement nazawng an hlawkpui kher nawh.

* Gospel singers nazawngin hun an vawng indik naw vong kher nawh.

* Chanchinbumi nia inhril nazawngin chanchinbu an nei kher nawh.

Indik iti thei am? Adang belsa inuom chun COMENT a hung ziek rawh.

For more kher nawhs visit www.khernawhshmar.com .

Zotuithieng hung dawn ve rawh

Damlai tuipui dungle vai fanga lamsuk le tung ei hraw mek lai in a changin tuidamna hmun a changin suorsietna hmun dam ei hraw hlaka, lungngainia hnem tu ding le hlimna nia duthusam kimna ding khawmin zotuithieng hi hung pan hlak rawh. Ei damlaini laminthluona  harsatna hai hi eiruolthatak minthla ngai lo anni hlaka amiruok chu ni po po hi an ang vawng ngai naw ang in hlimna ni khawm an her suok ve nawk hlak. Lungngaina nia mitthli hrupui ding le lawmna nia chawnban vawra thlangzarel thang ur pui ding che in “zotuithieng” in ngaina takin a lawmlut che. Ei hnufuolna mi dawmsing tu ding le ei hmasawnna le talent hai sawr tangkai theina dinga midawnsangtu le hmangruo thatak a hung ni ngei theina dingin hmang tangkai tum seng ding in zotuithiengin ngaina takin a fiel che.  Bloga thu ei update/post hai hi zotuithieng magazine bua ziek lang vawng a ni kher nawha a rem chang dan angpeia website hi siemdanglam/ update a ni lem. Thu/Article thawn nuom ei um anichun “zotuithieng@yahoo.com” a hin thawn ding.  Inthuruola kal chawi dignin zotuithieng an epi zing.

Thanks & Regards

Blog Admin.  Zotuithieng

Leiri Gospel Golden Jubilee photos

Tirko Laltinkhup Leiri khuoa pathien thu phur luttu

Jubilee zan programe

Jubilee Choir,Rev J Huoplien and wife

Jubilee Lungphun

Jubilee Lungphun-Alan Lalhrietzing

Jubilee Hall

Leiri Gospel Golden Jubilee Photos

Jubilee Banner

Leiri Gospel Golden Jubilee

Leiri Gospel Golden Jubilee hmang laia Vedeo clips le thlalak hai
ei websitea eila update thei hri naw leiin, website hawngtu hai
in hrietthiemna zotuithiengin angen anih. hun sawtnaw te ah hung
update eitum zing anih.

Israel-Mizo Identity

Israel-Mizo Identity

Mizo (zohnathlak) hnam hi Israel hnam inhmang laia pakhat eilo ni ngei ani ti thu chu Kum 2005 March ni 30 khan Shephardic Chief Rabbi Shalom Amar chun khawvel pumpui hrietah alo puong tah ani. Israel hnam inhmang laia (Menashe- Sinlung- Israel) thla hai ei nih ti in a hril fie bawk.

Thlatu suina anthawkin Israel: BC 721 vela Assuria ram anthawkin Israel hnam thenkhat hai chu ansumdawngna thil hai leiin China rama an lo luta, thang tamtak lo tharin tuchen khawm hin akhawsa hlun tam tak an um ta bawka, Great Wall of China indintu/bawltu hai lai akhawm ei thlatu hai anlo thang anih. Arama lokhawsa hmasa Buddist sakhuo cheltu hai in thisen hmanga inthawina ankhap leiin Israel Juda le Muslim sakhuo chel tu hai chu anlo buoi taha, Chuong ang peiin sertan ti khawm hi anlo thaw zawm thei tanaw anih, hieng mihai lai hin vawisun nia Mizo (zohnathlak) ei lo thang ngei anih, hun fe pei in vawisun hi kan lo thleng ta anih.
China ram a khawm eini ang tho Israel Lost Tribe hi an um ve nuola, 1948 khan China ram anthawkin 5000 chuongin hnam bo anina inhre chieng in Israel ram anlo pan tah ani.

Leiri khuo Gospel Golden Jubilee

Leiri khuo Gospel golden Jubilee (1958-2008 chu tarik ni 18 December 2008 Ningani khan Leiri khuo NC Hills (Assam) a ropui taka hmang zo a lo ni tah. Jubilee prokram hi ursun taka hmang a nia, chanchin tha phurluttu Tirko Darsanglien Rtrd. Pastor EFCI le Tirko Latinkhup haiin leiri khuoa pathien thuthlung ruoi sut dara bawkte an phun dan thukhawchang ngainuom um tak tak hai hril na an neia, an thu hril haiin pathien nau hai chona tha takel a pek. Hi jubilee hi mikhuol pawimaw le hotu lien dang dang in an uop mawia, Rev. J Huoplien neitham EFCI President, Dr Lalkhawlien, Rev Kawlthanglien, Rev Laltholien, Rev Lalremthang le Pastor dang thenkhat hawm an thang ve. Prokram hi sun le zan sawt chen hmang in a bik tak in Leiri khuo thalai inzawnkhawm Joint KTP haiin hun tawp hnai tieng skit en nuom um takel le fiemthu leiri khuoa pathien thu sutdar a ni tan tir laia ruol upa haiin pathien thu mak an ti zie le pawm harsa an ti zie a lema changin an in sira, mipui mit a thlaiin en nuom a um hle. A tin ta hai khawm tin hlei thei lovin hi fiem thutak lemchang hin mipui lo tin tah hai hall keng naw rak khawpin a kokir nawk vawnga zan khawvarin hlasak lengkhawm le thil dang danga inpawl khawmin tin an rel thei naw a nih. Jubilee Sovenier thatakel chu Dr. Lalkhawlienin a tlangzara, a dit hai chun Rs. 50 a inchawk theiin a um. Ruoi khawm a hnienginhnar takzeta, Vawksa le Bawngsa fak senglo khopa boutsai a ni leiin zan ah papuite le tlangval thenkhat hall puotieng HERO hai buoipui ngai lovin an re thip.
Golden Jubilee hi thlarau cho nilovin taksa ram tak a ding khawm in an hawiin fak le dawn a hnienginhnar hlea, a khuo le in awm lo khawpa ropuiin Pathienin mal a sawm a nih. Jubilee Programe Comitte members hai an sawl hle niin an lang. Sum hmusuokna dit angin a tam nawha sengso a hautak si leiin an thei tawp suoin an thangtlanga, an inrimna lalpan mal a sawma jubilee programe chu tluongtaka hmang liem a lo ni tah. Khawdanga lo inpem ta unau leiri khawsuok tamtakel an thang ve thei nawh, mani sin le tuon le pawimawna dang leia hung thang ve thei loa ngai el an nih, a san dang thu bel chieng thlak  hriet a um naw leiin. Leiri khuo kohran hai lalpan malsawm pei ding ditsakna in sang tak ei inhlan anih.

Zotuithieng Vol 1 Tuolbuol 2008

Leiri Khuo Chanchinbu hmasatak
Zotuithieng
(A remchang hun hun a suok)
Vol.1 No.1 Magazine Tuolbuol 2008

Editor:
Thuoifel L Neingaite

Correspondent:
Pu Zahninglo Hmar.

Office Address:
The Editor
Zotuithieng
(C/o Zahninglo Hmar)
BPO. Leiri.
P.O Joypur Raja Bazar, Cachar ,Assam
zotuithieng@yahoo.co.in
&
Thuoifel L Neingaite
Allahabad Bible Seminary
60/64 Stanley Rd. Allhabad
211 002 U.P India
Email: lalngaite@yahoo.com
OR
Alan Lalhrietzing
Website Admin.
Aprt. 65/26, 9th Cross, SG Palya, Bangalore-29
Email:alanvarte@yahoo.com

I TIEMDING HAI

Mihai tum an mi tih a ?

Lusunni a ei khawtlang

Kher lo…

Chanchin Lawrkhawm

Iem anhril a ?

Ngainuomun dang dang
Editorial
Hih ringlo khêltieng ei vêng chanchinbu hmasatak chuh a hang suok phawt el a ! A suok zawmpei di’m chuh. Upahaiin abul tan that a chanve zo antih a, abul ei tan tha thai si nawha. Iengpo khawm nisien, hang tan theia ei um rêng rêng leihin malsawmna mi petu Lapa kuomah ei lawmthu ei hril anih.

Zoram/khawzova chêng le khawsa chun ZOTUITHIENG umzie, anhnikzie le sawllâi le dangchâr laia hang dawna dangchâr sukrêtu le sawl hâdamtu anizie hrilfie sei ngailovin ei hriet seng ring aum.

Inchûkna tieng, khawtlâng inrêlbawl dan, kohran le thil dang dang ah ei khawtlâng hi a thlahnuoiin a dangchâr niin ei hrieta. Chuongang kawnga ei dangchârna sukrêtu ding lekhathiem, rorêldân thiem le khawtlâng hmangaitu indik ei pawimaw takzet anih.

Zotuithieng inhnik takel chu tlâng le muol lungpuihai kâra hung suok, a hnâr kang ngailo, thâllâi khawma luong zing hlak anih. Mihai dangchârna sukrêtu ei ni theina ding chun ei hung suokna hnâr a tha a ngai a Tuisampût ang tuihnar chun sawt adai ngai nawh.

Abîkin thangthar thalâi inchûktuhai hi ei khawtlâng le hnam thuoitu dâm la hung ni ding ei ni leiin ei suokna tuihnâr atha angai anih. Chu thiemna tuihnâr chu iengdang nilovin taimâkna, tumrûna le ringumnahai hi an nih.

Hi chanchinbu ei rênga tadinga ei hrietna sukzâutu le eiinphûtawk senga khawtlâng tadinga ei theinahai hmanga ei thawk tlâng theina hmangruo hung ni sien ti hi a thiltum anih

Zotuithieng magazine hi inthang duong takin hung inthang sienla ei khuo el bakah khaw dang dang a mihai tading khawma dawn thei ding tui thatak la hung ni ngei raw se.
Zotuithieng magazine tiemtuahai po po kumthar Chibai

Zotuithieng, Leiri Tuolbuol 2007

Article MIHAIIN TU’M AN MI TIH A?
-Thuoifel L Neingaite

Mani ngei nina indiktak hrilsuok hi thil harsa laia pakhat ni ve ngei atih. Isu Krista ngei khawm khan a zirtirhai kuomah mihaiin tu am ka nih an mi ti a? tiin andawn kha.

Ei nina hi chithum a um a. A hmasatak chu nia ei inhriet dân hi anih. Hi hi mani le mani ei inhriet dan lieu lieu anih.
A pahnina chu mihaiin nia an mi hriet dân a nih. Hi hih chi tamtak a um. Ei Pansak le Panthlanghai mihriet dan an ang naw el thei. Nisienlakhawm mihai mi hrietdan maniin ei i pawmlo, vantlangin an mi ngaidan a um thei anih. Entirna’n, mi dem hrat nihin kan hre naw el thei. Ka inkawlpa chauin mi dem hrat anga a mi ngai chu midangin chuonganga an mi ngai lêm naw chun mi ka dem ka ching naw a ni el thei. Amiruokchu, Pansak, pantlang, ruollepâi le vantlangin chuongang mi dem hrat anga an mi hriet ani chun kan diknawna ah an ni anin dik lem ning atih.
A pathumna chu, ei ninah tak tak a nih. Chu chu, mâni mani ei inhriet dan le miin an mi hrietdan nilovin ei nina tak tak anih. Mâni nina tak tak hriesuok thiem taphawt chun nun puithling le mani in ringzona neiin hma tieng an pan thei a nih

Mihaiin tuam an mi tia ti ngaituona leiin mitamtak chun mani inlang mawi tumin ei nina tak tak nilo ader in mihai mihmu ding chauva inlang mawi ei tum hlak. Chuongang nun neituhai chuh Laikin anga nuom hun hun a rawng thlâk ang, mani le mani inhlem mi an nih. Mani nina indiktak inlangsuokpui ngam hi nunpuitling neituhai nun anih. Mihausa nisilova mihausa anga khawsa le hausa a inngai chun tu’m ana tia an hre naw anih. Ei kristienna kawngah khawm mani hih tuam ei niha ti inhrelo mi tamtak ei um leiin mihaiin an mi hmu danah ei kristienna nekin ei suolna an hmu lem rawp hlak anih.

Lalpa zâr chauvin ei khawtlângin chanchintha ei dawngna akum sawmngana hmang dingin ei singsa mêka mitinin ei lawm seng ring a um. Chu ruol chun ei inngaituo ding tamtak um bawk atih. Mi kum sawmnga mi chuh mihriem kumtiem dânah mipuitling upa tieng ani tah ti ei hrietseng a. Ei intanna ngaituoin nunpuitling nei dinga ngai chuh ei nih tah. Kristien eini hma chun Leiri khuo chuh mihai nuizatbûr alo nih hlaka. Nit dang laia Leiri khuo mihai fiembûr khah kristien ei hungni china ainthawk inchûkna tieng, khawsûng nunghak thlangval inthuoidan le khawthlang inrêlbawldân kawng iengkimah mihai ei hnawt phak naw khawmin ei inphutawka thingtlang khawtea ding chun mihai entawnthlak ei loni hlak a. Mihai mihmudân ah khawm nunghak,thlangval tamna khuo le mitaima khuoah min an mi lo ngai hlak. Khangang ngirhmun kha iengleia ei lo nei thei am ning ata ? Tutieng hin teh mihaiin iengtinam mihaiin an mi hmu tah a ?, mihaiin tu’m an mi ti tah a ? Nunghak, thlangval-a leng hmanlo, innei kar nghakhla tamna khuo, nunghak thlangval inthuoidân le khawtlâng inrêlbawldân kawng tamtakah khuo entawnthlaklo khuo ei nitah ti hih mihai mihmudân chuh antah ti hi ei ngaituo nuom aum. Inchûkna tiengah ei schoolhai hi teh inhmalai a Leiri school min an hril ang khah a la nih am?. Pathien zar chauvin School Matric chen zotheina ei neia, hieng ei schoolhai hi teh khawsung hmangaina indiktak neia siemthat tumin iengchen am hma ei lak tah a?. Kei anga mirethei puotienga school tha a inchûktheilohai inhnemna umsun an nih si a.

Hieng ei hang hril tahhai bak a hin hril ding tamtak um atih. Hi lekha chite a kimtaka hang hril zo ding chun ka thusep thiemnain azo si nawh. Amiruokchuh chuongthuah iem la hril rawp ka ta ?. Mihaiin tu’m an mi tih a ? ti hi ngaituo hlak ei tiu. Mihaiin thiem an mi ti lei ringawta thiema inngai a thiem nisilo, mi’n hmasawna an mi ngai lei ela hmasawna inngai a hnungtawl zing si ei nih chun tu’m ei nih a, ei ngir hnum iem ana ti ei hriet naw anih Kum Sawmnga a upa Kristien khuo ei nih tah a, ei khawtlâng hnufuolnahai siemtha le indinthar nawk thei ding tawka puitling einih tah ti hih inhriein mi châng ngaklovin ei thei dân sengah hma lain thang la thar ei tiu.

A tawptaka chun unauhai hi hih hriezing ei tiu, ni dang laia Leiri khuo chuh mitaima khuo, nunghak thlangvâl tamna, khawtlâng inrêlbawldân tha khuo le lekha inchûk tamna khuo min anmi ti hlak a ni khah. Tû-tieng hin teh min chuong ang chun an mi la hmu am?.

Zotuithieng, Leiri Tuolbuol 2007

Ngaituo rawh.
Hlawthlingna thurûk chu beidawng nuomlo hi anih
Saphai Thuvar
Sipai ropui sâng tamtal nekin chanchinbu pakhat ti aum lem.

Kher lo…

Kumthar a dinga Pathien hma thutiemna nei nazawng hin kumtawp chen an thutiem an vawng dik vawng kher nawh

Thlangval, nunghak leng rawn nazawng ngaizawng nei vawng tina ani kher nawh

Biekin kai rawn nazawng thuhriltu thuhril an ngaithlak ngai kher nawh

Hmeltha nazawng an luck vawng kher nawh

Zu dawn nazawng hi misuol anni kher nawh, zu dawn a tha tina ani kher naw bawk

Dawra inthung rawn nazawng hai hin thil an inchawk kher ngai nawh

Pu Ruotsang Dawr le Pu Rosang Dawra thung ngun nazawng hai hih an pocket a gorom kher nawh

Dawra bat hau nazawng hai hin pawisa an neinaw lei khawm a ni kher nawh

Ngenna!!

Ei chanchinbu a thu ziek nuom nei hai tadingin kawt lientak hawng zing anih. Thuziek nuomtu hai chun feltaka ziekin Pu Zahninglo kuomah annawleh ei website administrator alanvarte@yahoo.com a pek/thawn ding.

Ei chancinbu a suok zawm pei theina dingin tangka thlawmtetea thangpui nuomtu mi thlawmngai, khawtlang hmangaituhai inthangpuina kan beisei zing. – Editor

Zotuithieng chanchinbu hi Allahabad Bible Seminary U.P a inthawka ei Editorin a hung publish anih. Hmatieng asuok zawmpei dan ding ngaituo zing a niha thurawn nei hai chun in thurawn mi hung pe dingin kan ngen cheu.

DAMSAWT NUOMHAI TA DINGA THURAWN

Hieng hriselna dinga thurawnhai hi hang thaw si hrim ta i hriselna kha tha sawt atih.

ZAL INHMA RAWH. Zan sawttak menga taksain a mamaw tawk i-mu hmulo hin hriselna le damsawtna a suksiet thei anih. Darkar riet bek in hman dingin zan mengsawt lovin zal inhma la i hriselna tha’ng ata damsawt i tih.

DUMZIEL HAWP BÂNSAN RAWH. Dumziel hawp hin upat hnunga hriselna vengtu pakhat ei taksa a um a suksieta chuchun thina an thlungtir thei. Dumziel hawp bansan la i hriselna tha’ng ata i damsung suksei bawk atih.

A THA ZAWNGIN THIL THLIR RAWH. Iengkim ngaitha lova atha zawnga thil thlir hin lungril a suk hlima 50%in thi inhma phana a suk thlawm

INNUI RIN NAW RAWH. Lungsen hin hriselna abîk phingpuia damna chikhat a suksiet thei.Mi thenkhat thung chu an inlâk puithu taluo leiin an innui nuom ngai nawh. Mi theida zawng ni lovin fiemthu tha ah in nui rin lovin in suk hlim hla rawh. Hriselna ta dinga tha pakhat anih.

(Thulakna, Kristian Thalai Chancinbu, Mizoram Synod)

Tukum sûng Pathienin malsawmna tamtaka vur ding chein ka disaka kan hlan che. Kumthar Chibai
-Editor

Zotuithieng, Leiri Tuolbuol 2007

Opinion LUSÛNNI A EI KHAWTLÂNG

Lusûnni ei hang ti hin lusûn ti umzie hrilfie ngailovin ei hrietthiem seng ring aum. Mihriem hringnun hi a hlu Siemtu in hlutaka inchawimawi tuo dinga a mi siem anih. Mihriem hi amal mal a khawsa nilovin a umkhawm a khawsa ei nih. Chuleiin khawvela hin rambung, khawpui, khawte tiemsenglo a um anih. Chuonganga a ruola umkhawm mihriemhai chu khuo le veng ram le hnam tiin ei in then hrang hlak. Mani chaua hringnun hmang thei khawvel ah tu mihriem khawm ei um nawh. Rannunghai chen khawm a ruol ruolin a um hrim anih.
Vangduoini a khuo le veng tuorpuina le hlimni a khuo le veng, ruol le paihai lawmpuina hai hi lo um ta naw sien chu mihriem hringnun hin hlutna nei naw nih.
Chuongang sietni thatni a thlawmngaina chu tienlai a inthawka ei pi le puhai nuntha em em, kristien ni hma hrim kawma Pathien thu le in zawm em em el anih.

Mihriem tuel khawm hi a thi naw ding tukhawm ei um nawh a. Mithi ni chuh mithipa/mithinu hminga thilthaw tawpna tak a ni eliin iengang mi khawm nisien a hlut thei ang le ei thei chin tawk a a ropui thei dân angtaka inza tak a ei inthlaliem hi a phu hle in ka hriet. Hi thu a ka hril nuomtak chu Lusûnni a ei khawtlâng in thuoidan hi anih.

Ei mithi ruong zawn dân hih. Mithi In a in thawka ruong ei fe pui dan hi a karchâng chu Sa inzawn nêk khawmin a hlu naw lem a hawi hlak an nawm. A ruong zawntuhai Pu Ngaichungsiekhai In an phâkin mipui azuituhai Pu Ngaidamhai tuol an phak chau hlak I lo en hlak hrim am? Vai Hinduhai vanram kailo dinga ei ngaihai hmana mithi ruong an hang zawn hin ienganga hla khawm nisien damtea fe puiin mipuiin to thapa zuiin an lawn hlak. Vairam ah kumli ka lo um tah a mithi nia an ruong zawn dan ka hmu chângin ei ni thlawmngai hman a in ngai hai nek khawm hin thlawmngaina an nei lem manih aw ti ding hiel in a um hlak. Chuleiin mithinia mithi ruong ei fe pui dan hi ngaituo that dinga tha anih. Ei thi ni ei ruong inza taka inthlaliem nuomlo um naw mei nih. Tuta ei thawdan hi chu ei thlak danglam chuh a ngai hle an tah. Thlangvalhai khawm thlan a inthawka la dinga ei fe hin a insung neituhai lung thawng zawnga ei hei hmaw hlak hi bansan chi anih. Thlawmngaina ei insuo ta si si chun a tawp chena ringum hi malsawmna anih.

Hiengang hin tlak danglam thei nisien. Ka ngaidân hang ziek ve lang. Mithi ruong In a inthawka ei hung zawn suok hin Val Upahai le Kohran Upa hunser neitu ding haiin damtea fe in hma thuoi haisien, chu hungah ruong zawnhaiin zuiin, mithi ruong hnung chara chun mithi sûng le kuo hai, chun mipuiin zui inla mawi bawk ata changkang thlak bawk ata mithi ruong kha ursun taka ei thlaliem hung ning ata lusûn tuortu ta ding khawma khawtlang hmangaina dawng bika ah in ngai hlak an tih.

Thlân vur dan hi teh. Thei nisien chu thlân a Inthlana hunser a hmang zoa chara mipui tin nghak lova in ri remruma thlân ei vur hlak hi bansan thei nisien, mipui tin la ngakin chu zoa chun ver chauin mawi lem dingin ka hriet. Thlawmngaina ei insou ta rau rau chun a tawp chena thlawmngai hi thlawmngaina tak tak chu anih.

Ei Pathien Thu chun Miin I chunga an thaw i nuom ang bawkin mi chung a khawm thaw ve rawh a tih kha. Ei thîni hi chu hi khawvela ei hminga thilthaw tawpna tak ding ani leiin inza taka inthlaliem ei phu seng anih. Chuonganga miin ei chunga an hung thaw theina ding chun eini khawma mi dang chungah ei thaw ve a ngai. Chu chu ei kalchar le in mawi, ei Pathien dit zawg, malsawm dawngna a nih. Khawtlânga ei thlawmngaina ei insuotu hi ei ta dinga thil thaw ei ni zing anioh ti hi ei hrietzing nuom a um.

(Ral khingtieng tiemzawm rawh—)

Ha ha ha ha…..
* Mi pakhat mi tikherpa khah Lo afe tawmin a nuhmei kuomah zan tieng ka hme ding Artui lo siem rawh ti’n ancha a, zanting chun a nuhmei chun artui zeu alo siempeka bu an hang fak ding chun iemata i zeu ti’n a nuhmei ahal hrepa, a zing ah chun abutin alo siempek nawka bu anhang fak ding chun iemata ilo but nawk ti’n a hal nawk a, A zing nawk a chun a nu hei chun vawisun chuh zeu le abut lo siem ta’ng ka ti tiin a zeu le abut alo siem pek nawk a, ahung thlung chun a pasal chun Iengdinga ZEU DING HI I BUT A, BUT DING HI I ZEU AM ala ti ta rawp … ti kher lawm lawm

Zotuithieng, Leiri Tuolbuol 2007

CHANCHIN RAMTIN LAWRKHAWM

* Pu Zahninglo December thla sung khan biel fangin Manipur, Cachar le Mizoram hai ah anzina, a rawngbawlna hlawk taka a hmang zo hnungin Ni 12 December khan In a hung inlawi.

* Ei editor Tv Thuoifel L Neingaite khawm Dt.2 January hin Allahabad Bible Seminary U.P a inthawkin Kolkata ah Inauguration of Every Tongue and Tribe Conference of E C I hmang ding fe’ng atih. April thla hin a Allahabad Bible Seminary a inthawkin B. Th a hung graduate ding an tah a, ei tawngtaina’n lo hrie hlak ei tiu.

* Tv Lalhrietzing khawm Bangalore Karnataka ah Microsoft Network Universal Agent in athawk zing April thla B Th., a graduate zo ah vêngah hung dingin an buotsai.

* Tv Zohmingthang khawm Bangalore ah M.Div inchukin aum zinga ama khawm chawl Summer chawl ah ahung ei beisei.

* Tukum ei khuo loze ding chu Haimawl hnâr ning atih.

HRIETDING
Ei chanchinbu insitum tak el hi arem chang hun hun a in suo rawp ei tum aniha, Ei inhnika ei tiem nuom anih chun ei thang thlâng a ngai ding anih. Tu tuma mi chu a man khawm ni lovin, khawtlangin tha ei tizawng ani le ninaw hrietna dingin Chenghni ei hung dawl ding anih.__ Pu Zahninglo
Iem an hril a?
“Kumthar ah chuh ka kawppui ding zawng ding mantah ka ti nih”
“Bawng inthat leh athla milo hla ro”….
Tv Jesrel (Parlien)

“Kawppui le Christmas le kumthar lawm ei hang hmang chuh kum dang leh an ang ta nawh ie….Pu Ngaia (Râmi)

Kasinthaw hmunkhat pui sap nunghak hmar tawng kan chuktira ‘Ka hmangai che’ ti hi ‘Khha-hi- mang-gai seh’ ati chu tie. A’n hai sat anih. A tai inzawl dei duoiin
Anta nawh ie marawi chok chok chok…!
Tv Alan Lalhriet, Bangalore (Rangte).

“Ka ruolhai nuhmei an nei rep rup a, kei khawm hi tukum chu thaw el ding mantah ka ti anih…” Tv Darte (Lalmêng)

A nuom nuomin pasal nei rawhai seh kei chu mani In a um hi nihawi ka la ti hri anih… Nk. Ramhlunmawi ( U Mawi)

Kei chuh tu khawmin midang thei ta nawnih hai kunthar a chuASAMSEI …
Tv Ramsiem (Lungawi)
A hnuoi a milim hi hang en ta, I mit an phier neng nung am ?. I nuom na tieng tieng a inthawk in hang en la i mit a suk buoi pei ani chun ei fiemthawna a hlawthing ti na ane’l.

————————————————————
Hi lai hi hmunruok chite aum. I nuom nuom hang ziek la
La chanchibua thil ziek i ne’l

Mi dang chunga thiltha thaw hi mamaw huna hmang dinga ro ei in khawl anga hlu anih. -CALDERON
Midanghai ta dinga thiltha thaw neilo chu Vân khin thangpui a tum thak naw. –SOPHOCLES